ଅସହାୟଙ୍କୁ ରାସନ ସାମଗ୍ରୀ ପ୍ରଦାନ

ବରୀ – ବରୀ ବ୍ଲକ ଅନ୍ତର୍ଗତ ରତ୍ନଗିରୀ ପଂଚାୟତର ଅଲିଆବାଦ ଗ୍ରାମର କୈଳାସ ଚନ୍ଦ୍ର ପ୍ରଧାନ ଙ୍କ ଘର ଗତ ବର୍ଷାରେ ସଂପୂର୍ଣ୍ଣ ଭାଙ୍ଗି ମାଟିରେ ମିଶି ଯାଇଛି । ୮୦ ବର୍ଷର ବୁଢି ମାଆ କୁ ନେଇ ୬ ଜଣ ପରିବାର ଆଜିକୁ ୨୦ ଦିନ ହେବ ପରଘରେ ଆଶ୍ରୟ ନେଇଛନ୍ତି । ଘରବାଲାର ଘର ଶିଘ୍ର ଛାଡିବାକୁ ତାଗିଦ୍ । ଧାନ ଚାଉଳ ଗଣ୍ଡାଏ ଯାହାଥିଲା ତାହା ବି ମାଟିରେ ମିଶିଗଲା । ନା ପାଖରେ ପଇସା ଅଛି ଖାଇବାକୁ ନା ବାସ ଖଣ୍ଡେ ଅଛି ମୁଣ୍ଡ ଗୁଞ୍ଜିବାକୁ । ରତ୍ନଗିରୀ ପଂଚାୟତ ସରପଂଚ ଏବିଷୟରେ କିଛି ଜାଣି ନାହାନ୍ତି ବୋଲି କହିଛନ୍ତି ଆଉ ଜାଣିଲା ପରେ ବି କୈାଣସି କାର୍ଯ୍ୟକ୍ରମ ନେଇ ନାହାନ୍ତି ବୋଲି ଜଣା ପଡିଛି । ବରୀ ତହସିଲଦାର ଏକଥା ଜାଣିଲା ପରେ ବି ନିରବ ଦର୍ଶକ ସାଜି ତାଙ୍କ ଦାୟିତ୍ୱ ସାରିଛନ୍ତି । ତେବେ ଘର ବା ଖାଦ୍ୟପେୟ ଦୂରର କଥା ମୁଣ୍ଡ ଗୁଞ୍ଜିବା ଲାଗି ତହସିଲ ପାଲ ଖଣ୍ଡେ ବି ଦେଇ ନାହିଁ । ଏକଥାକୁ ସାଧାରଣରେ ତୀବ୍ର ସମାଲୋଚନା କରାଯାଇଛି । ବରୀ ବ୍ଲକ ବି ଡି ଓ ଙ୍କୁ କୈଳାସ ପ୍ରଧାନ ପୂର୍ବରୁ ଭେଟିଥିଲେ ବି ତାଙ୍କର କିଛି କାର୍ଯ୍ୟକ୍ରମ ଦୃଷ୍ଟି ଗୋଚର ହୋଇ ନାହିଁ । ଅନ୍ତୋଦୟ ଯୋଜନାରେ ଅନ୍ତର୍ଭୂକ୍ତ ଦରିଦ୍ର ପରିବାର ର ନାମ ମଧ୍ୟ ସରକାରୀ ଗୃହ ବଂଟନ ତାଲିକାରେ ନଥିବା କଥା ଜଣା ପଡିଛି । ତେବେ ରାଜନୌତି ଦୃଷ୍ଟିଭଙ୍ଗୀ ହେଉ କିମ୍ବା ଶ୍ରୀ ପ୍ରଧାନ ପରିବାର ଅର୍ଥହୀନ ଦରିଦ୍ର ପରିବାର ହୋଇଥିବାରୁ ପଂଚାୟତ ଜାଣିଶୁଣି ତାଙ୍କର ନାମକୁ ସରକାରୀ ତାଲିକାର ବାଦ କରି ଦେଇଛି ବୋଲି ପ୍ରଧାନ ପରିବାର ତରଫରୁ ଅଭିଯୋଗ କରାଯାଇଛି । ତେବେ ଅନ୍ତୋଦୟ ଯୋଜନାରେ ମାସିକ ୩୫ କେ. ଜି ଚାଉଳ ପାଉଥିବା କଥା ପ୍ରକାଶ କରିଛନ୍ତି କୈଳାସ ଚନ୍ଦ୍ର ପ୍ରଧାନ । ଏହି ପରି ଦୁଃର୍ଦିନ ଅବସ୍ଥାର ଖବର ପାଇ ନୂଆ ଆଲୋକ ସ୍ୱେଚ୍ଛାସେବୀ ଅନୁଷ୍ଠାନ ଶ୍ରୀ ପ୍ରଧାନଙ୍କ ଭଙ୍ଗାଘର ନିକଟରେ ପହଁଚି ଗୋଟିଏ ପାଲ ସହ ଏକ ମାସର ଖାଦ୍ୟ ସାମଗ୍ରୀ ପ୍ରଦାନ କରିଥିବାର ଜଣା ପଡିଛି । ଏପରି ବିପଦ ସମୟରେ ନୂଆ ଆଲୋକ ର ସହଯୋଗକୁ ସାଧାରଣରେ ଭୂୟସୀ ପ୍ରସଂସା କରାଯାଉଛି ।