ରାଜ୍ୟ କ୍ୟାବିନେଟରେ ପର୍ଯ୍ୟଟନ ନୀତି ସଂଶୋଧିତ : ସୁକିନ୍ଦା ଅଶୋକଝରରେ ହେବ ବୋଟିଂ ବ୍ୟବସ୍ଥା

ସୁକିନ୍ଦା(ସଙ୍କେତ ଖବର)

ପର୍ଯ୍ୟଟନ କ୍ଷେତ୍ରର ବିକାଶ ଲାଗି ଓଡ଼ିଶା ପର୍ଯ୍ୟଟନ ନୀତି-୨୦୧୬କୁ ସଂଶୋଧିତ କରିଛନ୍ତି ରାଜ୍ୟ ସରକାର। ପର୍ଯ୍ୟଟନ କ୍ଷେତ୍ରରେ ପୁଞ୍ଜି ନିବେଶକାରୀଙ୍କୁ ଆକୃଷ୍ଟ କରିବା ଲାଗି ଇଡକୋ ପକ୍ଷରୁ ସୁଲଭ ମୂଲ୍ୟରେ ଜମି ଯୋଗାଇ ଦିଆଯିବ ବୋଲି ଆଜି(ଶୁକ୍ରବାର) ରାଜ୍ୟ କ୍ୟାବିନେଟରେ ନିଷ୍ପତ୍ତି ହୋଇଛି । ଠିକ୍ ଏହି ସମୟରେ ସବୁଜ ପରିବେଶ ମଧ୍ୟରେ ରହିଥିବା ସୁକିନ୍ଦାର ପର୍ଯ୍ୟଟନ ସ୍ଥଳ ଅଶୋକ ଝରର ବିକାଶ ଲାଗି ବିଧାୟକ ଇଂ ପ୍ରୀତିରଞ୍ଜନ ଘଡ଼ାଇ ଉଦ୍ୟମ ଆରମ୍ଭ କରିଛନ୍ତି।ବଣ ପାହଡ଼ ଘେରା ଅଶୋକ ଝରର ସୌନ୍ଦର୍ଯ୍ୟ କରଣ ସହ ନିକଟକେ ଥିବା ଜଳାଶୟରେ ବୋଟିଂ(ନୌଚାଳନା)ର ବ୍ୟବସ୍ଥା କରିବା ଲାଗି ନିଷ୍ପତ୍ତି ହୋଇଛି। ଏନେଇ ବିଧାୟକ ଘଡ଼ାଇଙ୍କ ସହ କଟକ ଡିଏଫଓ ସୁଦର୍ଶନ ପାତ୍ର ଏବଂ ବନ ବିଭାଗର ଅନ୍ୟାନ୍ୟ ଅଧିକାରୀ ଅଶୋକ ଝର ଯାଇ ସ୍ଥିତି ଅନୁଧ୍ୟାନ କରିଛନ୍ତି। ପର୍ଯ୍ୟଟନର ବିକାଶ ସହ ସନ୍ତୁଳିତ ପରିବେଶ ଉଦ୍ଦେଶ୍ୟରେ ବଟାନିକାଲ୍ ଗାର୍ଡେନ(ଜୈବ ବିବିଧତା ପାର୍କ) ପ୍ରତିଷ୍ଠା କରିବା ଲାଗି ଆଜି ୪ଟି ସ୍ଥାନରେ ଜମି ଚିହ୍ନଟ ହୋଇଛି।

ଏହାସହ କୁହିକାର ପଦ୍ମ ପୋଖରୀରୁ ମହାଗିରି ପର୍ବତମାଳା ଯାଏଁ ଲମ୍ବିଥିବା ଶତାଧିକ ଏକର ଜମିରେ ଆଡିବନ୍ଧ ନିର୍ମାଣ ସହ ବୃକ୍ଷରୋପଣ କରାଯିବାକୁ ସ୍ଥିର ହୋଇଛି।ଫଳରେ ନିକଟସ୍ଥ ଜମି ଜଳସେଚିତ ହୋଇପାରିବ,ଆଉ ଲାଭାନ୍ୱିତ ହୋଇପାରିବେ ଚାଷୀ।ଏହା ଦ୍ୱାରା ଖଣି ଅଞ୍ଚଳର ପାଣି ସମସ୍ୟା ମଧ୍ୟ ଅନେକାଂଶରେ ଦୂର ହୋଇପାରିବ।

ସେହିଭଳି ରାସୋଁଳ ପଞ୍ଚାୟତର କଲରଙ୍ଗି ଠାରେ ମେଡିସନାଲ୍ ପାର୍କ ପ୍ରତିଷ୍ଠା କରାଯାଇ ବୃକ୍ଷମାନଙ୍କର ଔଷଧିୟ ଗୁଣ ସମ୍ପର୍କରେ ସଚେତନତା ସୃଷ୍ଟି କରାଯିବ। କେବଳ ସୁକିନ୍ଦା ବ୍ଲକ ନୁହେଁ କଳିଙ୍ଗ ନଗର ମହୋତ୍ସବ ହେଉଥିବା ଦାନଗଦିର ତେଲିବାହାଳି ପଡିଆରେ ବୃକ୍ଷରୋପଣ କରାଯିବ।ଅଶୋକ ଝରର ବିକାଶ ସମସ୍ତ ପ୍ରକଳ୍ପ ଗୁଡିକ ଲାଗି ଡିଏମଏଫ(ଜିଲ୍ଲା ଖଣିଜ ନ୍ୟାସ) ପାଣ୍ଠିରୁ ଅର୍ଥ ଖର୍ଚ୍ଚ ହେବ।