ବ୍ୟାସନଗରରେ ମା ବିରଜା ମନ୍ଦିର ପ୍ରତିଷ୍ଠା ହେଉ :ବିଶ୍ୱଜିତ୍ ନାୟକ

କୋରେଇ(ସଙ୍କେତ ଖବର)ଯାଜପୁର ହେଉଛି ଭାରତ ବର୍ଷର ପ୍ରଥମ ଶକ୍ତିପୀଠ, ଯେଉଁ ପୀଠରେ ଶକ୍ତିମୟୀ ମା ବିରଜା, ବିଷ୍ଣୁ(ବରାହ), ସଦାଶିବ ବାସ କରନ୍ତି । ଯାଜପୁରିଆଙ୍କ ପରିଚୟ କହିଲେ ମା ବିରଜାଙ୍କୁ ବୁଝାଏ। ମା ବିରଜାଙ୍କ ମହିମାର ପ୍ରଚାର ଓ ପ୍ରସାର ପାଇଁ ବ୍ୟାସନଗର ସମେତ ରାଜ୍ୟର ବିଭିନ୍ନ ପ୍ରାନ୍ତରେ ମା ଙ୍କ ମନ୍ଦିର ପ୍ରତିଷ୍ଠାକୁ ବିରୋଧ କରା ନ ଯାଇ ସ୍ବାଗତ କରାଯାଉ। ଆଜି ଏଭଳି ଦାବି କରିଛନ୍ତି କୋରେଇ ବିଜେପି ବିଧାୟକ ପ୍ରାର୍ଥୀ ବିଶ୍ୱଜିତ୍ ନାୟକ ।
ମହର୍ଷି ବ୍ୟାସଦେବ ମହାଭାରତ ରଚନା କରିବା ପୂର୍ବରୁ ଯାଜପୁର ଆସି ମା ବିରଜାଙ୍କ ଦର୍ଶନ କରିଥିଲେ । ଫେରିବା ବାଟରେ ବ୍ୟାସସରୋବର ନାମକ ସ୍ଥାନରେ କିଛି ଦିନ ଅବସ୍ଥାନ କରି ମା ଙ୍କ ଉଦ୍ଦେଶ୍ୟରେ ମାଘସପ୍ତମୀରେ ଏକ ଯଜ୍ଞ କରିଥିଲେ। ସେଥିପାଇଁ ସେହି ସ୍ଥାନ ଆଜି ପବିତ୍ର ଏବଂ ପୌରାଣିକ ଦୃଷ୍ଟିକୋଣରୁ ବ୍ୟାସନଗର ସହ ଯାଜପୁରର ସମ୍ପର୍କ ମଧ୍ୟ ଅତି ନିବିଡ଼ । ଆହୁରି ମଧ୍ୟ ଉଦାହରଣ ଦେଇ ସେ କହିଥିଲେ ଯେ ଯାଜପୁରର ଅହିୟାସ ଅଞ୍ଚଳ ତରପଦା ପଞ୍ଚାୟତର ଗୋପକୁଳ ଗାଁ, ଚୌଦ୍ଵାର ପୌରପରିଷଦ ଅନ୍ତର୍ଗତ ୧୨ନଂ ୱାର୍ଡର ଓଟିଏମ୍ କଲୋନୀରେ ବିରଜା ମନ୍ଦିର ଥିବା ସ୍ଥଳେ ରାଉରକେଲା ହନୁମାନ ବାଟିକା ପରିସରରେ ଏକ ଭବ୍ୟ ବିରଜା ମନ୍ଦିର ନିର୍ମାଣ ପାଇଁ ସେପ୍ଟେମ୍ବର ୨୦୧୯ ମସିହାରୁ ଶୁଭ ପଡ଼ିସାରି ଏବେ ସଂପୂର୍ଣ୍ଣ ହେବା ଅବସ୍ଥାରେ ଅଛି ।

ବ୍ୟାସନଗର ରେ ନିର୍ମାଣାଧୀନ ମା ବିରଜା ମନ୍ଦିର

ତେବେ ଆମେ ସମସ୍ତେ ଘରେ ଘରେ ମା ବିରଜାଙ୍କ ଫଟୋଚିତ୍ର ରଖି ପୂଜାର୍ଚ୍ଚନା କରୁଥିବାବେଳେ , ବ୍ୟାସନଗର ଅଞ୍ଚଳରେ ଯଦି ଜଣେ ଭକ୍ତ ଦୁଇ ପାଦ ଆଗକୁ ଯାଇ ମା ଙ୍କ ଛୋଟିଆ ମନ୍ଦିରଟି ନିର୍ମାଣ କରୁଛି, ତେବେ ଏଥିରେ ଅସୁବିଧା କେଉଁଠି ବୋଲି ପ୍ରଶ୍ନ କରିଛନ୍ତି । ପ୍ରଶାସନ କାହା ପ୍ରରୋଚନାରେ ଏତେ ଅସହିଷ୍ଣୁ ହୋଇ ପଡ଼ିଛି ? ଜଣେ ଭକ୍ତଙ୍କ ଦ୍ଵାରା ନିର୍ମିତ ମନ୍ଦିରକୁ ଦ୍ଵିତୀୟ ବିରଜା ମନ୍ଦିରର ଆଖ୍ୟା ଦିଆଯାଇ ଅଯଥା ବାଦ ବିବାଦ, ଆଲୋଚନା ସମାଲୋଚନା, ତର୍କ ଓ ବିତର୍କ କରା ନ ଯାଉ । ବ୍ୟାସନଗର ସମେତ ରାଜ୍ୟର ବିଭିନ୍ନ ସ୍ଥାନରେ ଅନାବାଦି ଯାଗାରେ ଅନେକ ମଠ, ମନ୍ଦିର, ମସଜିଦ, ଚର୍ଚ୍ଚ, ଗିର୍ଜା ନିର୍ମାଣ ହେଉଥିବା ବେଳେ ମା ବିରଜାଙ୍କ ମନ୍ଦିର ନିର୍ମାଣ ପାଇଁ ବ୍ୟାସନଗର ତହସିଲ ପକ୍ଷରୁ ତାଙ୍କୁ ନୋଟିସ କରିବା ଦୁର୍ଭାଗ୍ୟଜନକ ବୋଲି ସେ କହିଛନ୍ତି।
ଶ୍ରୀ ନାୟକ ଆହୁରି ମଧ୍ୟ କହିଛନ୍ତି ଯେ ଶାନ୍ତିପ୍ରିୟ ବ୍ୟାସନଗରବାସୀ ତଥା କୋରେଇବାସୀଙ୍କ ଧର୍ମୀୟ ଭାବନା, ଭାବାବେଗ ପ୍ରତି ପ୍ରଶାସନ କୁଠାରଘାତ ନ କରି , ସେମାନଙ୍କ ଚିନ୍ତାଧାରାକୁ ସମ୍ମାନ ଦେଇ ଏଭଳି କାର୍ଯ୍ୟକ୍ରମରୁ ନିବୃତ୍ତ ରହୁ । ଆମେ ଜଣେ ଜଣେ ଯାଜପୁରିଆ ହିସାବରେ ମା ବିରଜାଙ୍କ ସନ୍ତାନ ହିସାବରେ ତାଙ୍କ ମହିମାର ପ୍ରଚାର ଓ ପ୍ରସାର ପାଇଁ ସମସ୍ତେ ଦଳଗତ ନିର୍ବିଶେଷରେ ନିଜ ନିଜ ସ୍ତରରେ ପ୍ରୟାସ କରିବା ଉଚିତ୍ । ବ୍ୟାସନଗର ଅଞ୍ଚଳର ମୂରବୀ, ବୁଦ୍ଧିଜୀବୀ ଓ ବିଭିନ୍ନ ସାମାଜିକ ସଙ୍ଗଠନର କାର୍ଯ୍ୟକର୍ତ୍ତା ମାନେ ଏକତ୍ରିତ ହୋଇ ମା ବିରଜାଙ୍କ ମନ୍ଦିର ନିର୍ମାଣ ସପକ୍ଷରେ ଉଠାଇଥିବା ଦାବିକୁ ପ୍ରଶଂସା କରିବା ସହ ସମସ୍ତେ ସହଯୋଗର ହାତ ବଢ଼ାଇବାକୁ ନିବେଦନ କରିଛନ୍ତି ।
ଶେଷରେ ଶ୍ରୀଯୁକ୍ତ ନାୟକ ଭାଇଚାରାର ସହର ବ୍ୟାସନଗରରେ ମା ବିରଜାଙ୍କ ମନ୍ଦିର ନିର୍ମାଣରେ ପ୍ରଶାସନ ଅଯଥା ହସ୍ତକ୍ଷେପ ନ କରି ଅଞ୍ଚଳବାସୀଙ୍କ ସହଯୋଗ ତଥା ମା ଙ୍କ ଆଶୀର୍ବାଦରେ ମନ୍ଦିର ନିର୍ମାଣ କାର୍ଯ୍ୟ ଯଥା ଶୀଘ୍ର ସଂପୂର୍ଣ୍ଣ ହୋଇ ମା ପୂଜା ପାଆନ୍ତୁ ବୋଲି ଆଶା ପୋଷଣ କରିଛନ୍ତି ।