ବ୍ୟାସନଗର ରେ ଆନ୍ତଜିଲ୍ଲା ଦୃଷ୍ଟିବାଧିତ କ୍ରିକେଟ ଟୁର୍ଣ୍ଣାମେଣ୍ଟ ଉଦଘାଟିତ

ବ୍ୟାସନଗର(ସଂକେତ ଖବର)ସ୍ଥାନୀୟ ଏନସି ହାଇସ୍କୁଲ ଖେଳପଡ଼ିଆ ଠାରେ ଭିସାଗ୍ରୁପ୍ ସହଯୋଗରେ ଏବଂ ଓଡିଶା ଦୃଷ୍ଟିବାଧିତ କ୍ରିକେଟ ସଂଘ ତତ୍ତ୍ବାବଧାନରେ ଆଶା ଅଭିଳାଷା ସାମାଜିକ ଅନୁଷ୍ଠାନ ଆନୁକୂଲ୍ୟରେ 1ମ ବାର୍ଷିକ ଦୃଷ୍ଟିବାଧିତ କ୍ରିକେଟ ଟୁର୍ଣ୍ଣାମେଣ୍ଟ ଉଦଘାଟିତ ହୋଇଯାଇଛି। ଉଦଘାଟନୀ ଦିବସରେ ଅତି ଚମତ୍କାର କ୍ରିଡା ପ୍ରଦର୍ଶନକରି ଯାଜପୁର ଟିମ୍ ଫାଇନାଲକୁ ଉନ୍ନିତ ହୋଇଛି। ଉଦଘାଟନୀ ମ୍ୟାଚ ଅନୁଗୁଳ ଓ ବାଲେଶ୍ଵର ମଧ୍ଯରେ ଅନୁଷ୍ଠିତ ହୋଇଥିଲା। ଅନୁଗୁଳ ପ୍ରଥମେ ଟସ୍ ଜିତି ବାଲେଶ୍ବରକୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲା। ବାଲେଶ୍ବର ବ୍ୟାଟିଂ କରି ନିର୍ଦ୍ଧାରିତ 7ଓଭରରେ 3ଉଇକେଟ ବିନିମୟରେ 108ରନ୍ ସଂଗ୍ରହ କରିଥିଲା।

ଦଳ ପକ୍ଷରୁ ସିଙ୍ଗିରାଇ ମାଝୀ 73ରନ୍ ସଂଗ୍ରହ କରିଥିଲେ।ଏହାର ଜବାବରେ ଅନୁଗୁଳ ସମସ୍ତ ଉଇକେଟ ହରାଇ 76ରନ୍ କରି ପରାଜିତ ହୋଇଥିଲା। 2ୟ ମ୍ୟାଚ ମୟୁରଭଞ୍ଜ ଓ ଯାଜପୁର ମଧ୍ଯରେ ଅନୁଷ୍ଠିତ ହୋଇଥିଲା। ଯାଜପୁର ଟସ୍ ଜିତି ବ୍ୟାଟିଂ କରି ଦୁଇ ଉଇକେଟ ବିନିମୟରେ 146ରନ୍ ସଂଗ୍ରହ କରିଥିଲା। ଦଳ ପକ୍ଷରୁ ଆନ୍ତର୍ଜାତିକ କ୍ରିଡାବିତ୍ ସୁଖରାମ ମାଝୀ ଓ ନକୁଳ ବଡନାୟକ ଯଥାକ୍ରମେ 88 ଓ 54 ରନ୍ ସଂଗ୍ରହ କରିଥିଲେ। ଜବାବରେ ମୟୁରଭଞ୍ଜ 73ରନ୍ କରି ପରାଜିତ ହୋଇଥିଲା। ସେହିପରି 3ୟ ମ୍ୟାଚ ଯାଜପୁର ଓ ବାଲେଶ୍ଵର ମଧ୍ଯରେ ଅନୁଷ୍ଠିତ ହୋଇଥିଲା। ବାଲେଶ୍ଵର ପ୍ରଥମେ ବ୍ୟାଟିଂ କରି 86ରନ୍ ସଂଗ୍ରହ କରିଥିଲା। ଯାଜପୁର ସହଜରେ ଆବଶ୍ୟକୀୟ ବିଜୟ ସଂଗ୍ରହ କରି ଫାଇନାଲକୁ ପ୍ରବେଶ କରିଥିଲା। ପ୍ରଥମ ଦିନର ଶେଷ ତଥା ଚତୁର୍ଥ ମ୍ୟାଚ ଅନୁଗୁଳ ଓ ମୟୁରଭଞ୍ଜ ମଧ୍ଯରେ ଅନୁଷ୍ଠିତ ହୋଇଥିଲା। ମୟୁରଭଞ୍ଜ ବ୍ୟାଟିଂ କରି 61ରନ ସଂଗ୍ରହ କରିଥିଲା। ଅନୁଗୁଳ ଆବଶ୍ୟକ ରନ୍ ସଂଗ୍ରହ କରି ବିଜୟଲାଭ କରିଥିଲା। ଉଦଘାଟନୀ ଉତ୍ସବର ଉଦଘାଟକ ଭାବେ ଯାଜପୁର ଏସପି ରାହୁଲ ପିଆର, ସମ୍ମାନୀତ ଅତିଥି ଭାବେ କଳିଙ୍ଗନଗର ଭିସାଷ୍ଟିଲର ନିର୍ଦ୍ଦେଶକ ମନୋଜ କୁମାର, ରାଜ୍ଯ ମହିଳା କଂଗ୍ରେସ ସଭାନେତ୍ରୀ ତଥା ବ୍ୟାସନଗର ପୂର୍ବତନ ପୌରାଧ୍ୟକ୍ଷା ବନ୍ଦିତା ପରିଡା ଓ ରାଜ୍ଯ ଦୃଷ୍ଟିବାଧିତ କ୍ରିକେଟ ଆସୋସିଏସନ(କ୍ୟାଭି)ର ସଭାପତି ତଥା ଭାରତ ତରଫରୁ କ୍ରିଡା ପ୍ରଦର୍ଶନ କରିଥିବା ଆନ୍ତର୍ଜାତିକ ଖେଳାଳୀ ମହମ୍ମଦ ଜାଫର ଇକବାଲ ଯୋଗଦେଇଥିଲେ।

ଆଶା ଅଭିଳାଷା ଉପଦେଷ୍ଟା ତଥା ସାମ୍ବାଦିକ ସୁଜିତ ମଲ୍ଲିକ ସଭାପତିତ୍ବ କରିଥିଲେ। ଏଥିରେ ଆଶା ଅଭିଳାଷାର ସମ୍ପାଦକ ତଥା ସାମ୍ବାଦିକ ଜ୍ଞାନରଞ୍ଜନ ଓଝା ଧନ୍ଯବାଦ ଅର୍ପଣ କରିଥିଲେ। ଅନ୍ୟମାନଙ୍କ ମଧ୍ଯରେ ସାମ୍ବାଦିକ ବିକ୍ରମ ସାହୁ, ଜ୍ୟୋତିସ୍ମିତା ନାୟକ, ଆଶୁତୋଷ ବଳ, ଆଶା ଅଭିଳାଷାର ସଭାପତି ଭଗବାନ ପଣ୍ଡା ପ୍ରମୁଖ ଖେଳ ପରିଚାଳନାରେ ସହଯୋଗ କରିଥିଲେ। ଏହି କ୍ରିଡାରେ ଭାରତକୁ ଗୌରବାନ୍ୱିତ କରିଥିବା 6ଜଣ ଖ୍ୟାତିସମ୍ପନ୍ନ ଆନ୍ତର୍ଜାତିକ ଖେଳାଳୀ ଯୋଗଦେଇଛନ୍ତି। ଚନ୍ଦ୍ରଶେଖର ପଟ୍ଟନାୟକ, ଦୀପକ ନାୟକ ଖେଳ ପରିଚାଳନା କରିଥିବା ବେଳେ କିରଣ କୁମାର ନାୟକ ସ୍କୋରର ଦାୟିତ୍ବ ତୁଲାଇଥିଲେ। ଆସନ୍ତା କାଲି ଫାଇନାଲ ମ୍ୟାଚ ଅନୁଷ୍ଠିତ ହେବ।