ରାଜ୍ୟ ସରକାରଙ୍କ ପକ୍ଷରୁ କୋଭିଡ ମୃତକଙ୍କୁ ମିଳିବ ଅନୁକମ୍ପା ରାଶି
ଭୁବନେଶ୍ୱର (ସଙ୍କେତ ଖବର): କୋଭିଡ୍ ମହାମାରୀରେ ମୃତ୍ଯୁବରଣ କରିଥିବା ନାଗରିକମାନଙ୍କ ପରିବାର ସଦସ୍ୟ ବା ନିକଟତମ ସମ୍ପର୍କୀୟଙ୍କୁ ଅନୁକମ୍ପାମୂଳକ ସହାୟତା ରାଶି ପ୍ରଦାନ ନିମନ୍ତେ ରାଜ୍ଯ ସରକାର ବ୍ୟାପକ ପ୍ରସ୍ତୁତି ଆରମ୍ଭ କରିଛନ୍ତି। ଏଥିପାଇଁ ମୁଖ୍ଯ ଶାସନ ସଚିବଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ସମନ୍ଵୟ ବୈଠକରେ ସମସ୍ତ ଜିଲ୍ଲାର ତହସିଲ ଏବଂ ବ୍ଲକ୍ସ୍ତରୀୟ ଅଧିକାରୀମାନେ ଯୋଗ ଦେଇଥିଲେ।
କୋଭିଡରେ ମୃତ୍ଯୁବରଣ କରିଥିବା ଲୋକଙ୍କ ନିକଟତମ ସମ୍ପର୍କୀୟଙ୍କୁ ୫୦ ହଜାର ଟଙ୍କା ଲେଖାଏ ଅନୁକମ୍ପାମୂଳକ ସହାୟତା ପ୍ରଦାନ କରାଯିବ। ଧନୀ, ଗରୀବ ନିର୍ବିଶେଷରେ ସବୁ ବର୍ଗର ଲୋକ ଏହି ସହାୟତା ପାଇ ପାରିବେ। ଅନ୍ୟ କୌଣସି ଯୋଜନାରେ ସହାୟତା ପାଇଥିବା ବ୍ଯକ୍ତି ବା ପରିବାର ମଧ୍ଯ ଏହି ସହାୟତା ପାଇଁ ଯୋଗ୍ଯ ବିବେଚିତ ହେବେ।
ଦରଖାସ୍ତ ଗ୍ରହଣ କରିବା ଠାରୁ ଆରମ୍ଭ କରି ଅନୁକମ୍ପା ରାଶି ପ୍ରଦାନ ପର୍ଯ୍ୟନ୍ତ ସମସ୍ତ ପ୍ରକ୍ରିୟାକୁ ଲୋକଙ୍କ ନିମନ୍ତେ ସରଳ ଏବଂ ସହଜଲବ୍ଧ କରିବା ପାଇଁ ମୁଖ୍ଯ ଶାସନ ସଚିବ ସମସ୍ତ ଜିଲ୍ଲାପାଳ, ଜିଲ୍ଲା ମୁଖ୍ଯ ଚିକିତ୍ସା ଅଧିକାରୀ ଏବଂ ଏହି ପ୍ରକ୍ରିୟା ସହ ଜଡିତ ସମସ୍ତଙ୍କୁ ନିର୍ଦ୍ଦେଶ ଦେଇଛନ୍ତି। ଅନୁଦାନ ପାଇଁ ମୃତ ବ୍ଯକ୍ତିଙ୍କ ପରିବାର ନିର୍ଦ୍ଧାରିତ ଫର୍ମ୍ରେ ଜିଲ୍ଲାପାଳମାନଙ୍କୁ ଅନ୍ଲାଇନ୍ ବା ଅଫ୍ଲାଇନ୍ରେ ଦରଖାସ୍ତ ଦେଇପାରିବେ।
କୋଭିଡ ପଜିଟିଭ ହୋଇ ୩୦ ଦିନ ମଧ୍ଯରେ ଘରୋଇ ପୃଥକବାସ/ ହସ୍ପିଟାଲରେ ମୃତ୍ୟୁ ହୋଇଥିବା ବ୍ୟକ୍ତିଙ୍କ କ୍ଷେତ୍ରରେ ଏହା ଲାଗୁ ହେବ। ଦରଖାସ୍ତ ଗ୍ରହଣ, ମଞ୍ଜୁରୀ ଏବଂ ସହାୟତା ପ୍ରଦାନ ଜିଲ୍ଲାସ୍ତରରେ ହେବ। ନିୟୋଜିତ ଅଧିକାରୀମାନଙ୍କୁ ଏଥି ପାଇଁ ସ୍ବତନ୍ତ୍ର ତାଲିମ ପ୍ରଦାନ କରାଯିବ।
