ଯାଜପୁର ରେ ହାତୀ ଆତଙ୍କ, ଆକ୍ରମଣ ରେ ଜଣେ ଗୁରୁତର

ଯାଜପୁର (ସଙ୍କେତ ଖବର): ଗତ କିଛି ଦିନ ଧରି ବଡଚଣା ଓ କଟକ ସାଲେପୁର ଆଞ୍ଚଲ ରେ ଆତଙ୍କ ଖେଳାଇଥିବା ହାତୀ ଆଜି ଯାଜପୁର ସଦର ଥାନା ଅଞ୍ଚଳରେ ଆତଙ୍କ ଜାରି ରଖିଛି । ହାତୀ ଆକ୍ରମଣ ରେ ଜଣେ ଗୁରୁତର ହୋଇ ଯାଜପୁର ମୁଖ୍ୟ ଡାକ୍ତରଖାନା ରେ ଭର୍ତି ହୋଇଛନ୍ତି । ଗୁରୁତର ବ୍ୟକ୍ତି ହେଉଛନ୍ତି ବ୍ରହ୍ମବରଦା ଅଞ୍ଚଳର ନିତ୍ୟାନନ୍ଦ ଗିରି। ତାଙ୍କୁ ବ୍ରହ୍ମବରଦା ମହିମା ଛକ ନିକଟରେ ଆକ୍ରମଣ କରିଥିଲା । ଡାଳିଜୋଡା ଫରେଷ୍ଟ ରେଞ୍ଜ ଅଞ୍ଚଳରେ କିଛି ଦିନ ହେଲା ଚଲା ବୁଲା କରୁଥିବା ଏହି ହାତୀଟି ରସୁଲପୁର ବ୍ଲକ ଅଞ୍ଚଳକୁ ଚାଲି ଆସିଥିବା ଅନୁମାନ କରାଯାଉଛି । ହାତୀଟି ସଦର ଥାନା ଅନ୍ତର୍ଗତ ବିଭିନ୍ନ ଗ୍ରାମ ରେ ବୁଲାବୁଲି କରୁଛି ।

ଯାହାର ଭିଡିଓ ସି ସି ଟିଭି କ୍ୟାମେରା ରେ କଏଦ ହୋଇଛି । ଏହି ହାତୀକୁ ଘଉଡାଇବା ପାଇଁ ଜିଲ୍ଲା ଓ ଜିଲ୍ଲା ବାହାର ବିଭିନ୍ନ ରେଞ୍ଜରୁ ବହୁ ବନବିଭାଗ କର୍ମଚାରୀମାନେ ଏଠାରେ ଡେରାପକାଇଥିବା ବେଳେ ଡ଼ାକବାଜି ମାଧ୍ୟମରେ ପ୍ରଚାର କରି ଲୋକମାନଙ୍କୁ ସଚେତନ କରୁଛନ୍ତି । ତେବେ ଆଜି ଭୋର ସମୟରେ ନୁଣୁପୁର ଗ୍ରାମ ନିକଟସ୍ଥ ଧାନ କିଆରୀରେ ହାତୀଟି ବୁଲୁଥିବା ଲୋକେ ଦେଖିଥିବା ବେଳେ ପରେ ହାତୀଟି ଆଖୁ କିଆରୀ ମଧ୍ୟକୁ ପସିଯାଇଥିଲା ।

ଏହି ଅଞ୍ଚଳକୁ ପ୍ରଥମକରି ହାତୀ ପଶିଆସିଥିବାରୁ ଗ୍ରାମବାସୀମାନେ ଆତଙ୍କିତ ହୋଇପଡିଛନ୍ତି । ହାତୀକୁ ଘଉଡାଇବା ପାଇଁ ବନବିଭାଗ ପକ୍ଷରୁ ବ୍ୟବସ୍ଥା କରିବାକୁ ଗ୍ରାମବାସୀମାନେ ଦାବି କରିଛନ୍ତି ।