ମା କଣ ଆଉ ଉଠିବ?

କରୋନା କଟକଣାରେ ଦେଶବ୍ୟାପି ଘଟି ଚାଲିଥିବା ଯନ୍ତ୍ରଣା ଦାୟକ ଘଟଣା କ୍ରମରେ ଯୋଡି ହୋଇଯାଇଛି ଆଉ ଏକ ଲୋମ ଟାଙ୍କୁରା କାହାଣୀ । ବିହାର ମୁଜାଫରପୁର ରେଳ ଷ୍ଟେସନରେ ଗତ ସୋମବାରର ଏ ଦୃଶ୍ୟ । ଦାଦନ ଖଟିବାକୁ ଯାଇଥିବା ଗୋଟିଏ ମା’ ଶ୍ରମିକ ସ୍ପେଶାଲ ଟ୍ରେନରେ ଆସି ଷ୍ଟେସନରେ ପହଞ୍ଚିବା ପୂର୍ବରୁ ଅସୁସ୍ଥ ହୋଇ ପଡିଥିଲେ।

ଅତ୍ୟଧିକ ଗରମ ଓ ଖାଦ୍ୟାଭାବରୁ ଷ୍ଟେସନରେ ପହଞ୍ଚିବା ବେଳକୁ ଜୀବନ ଚାଲି ଯାଇଥିଲା। ଦାଦନ ଯନ୍ତ୍ରଣାର ଏହି ନଗ୍ନ ଚିତ୍ର ଦେଖି ସାରା ଦେଶ ହତବାକ୍ ହୋଇଯାଇଛି । ଏ କଥା ମା କୋଳର ଛୋଟିଆ ଅଜ୍ଞାନ ଶିଶୁଟିବା ଜାଣିଥାନ୍ତା କେମିତି ! ଷ୍ଟେସନରେ ମା’ର ମୃତ ଦେହକୁ ଲୁଗା ଢଙ୍କା ଯାଇଥିବା ବେଳେ ବାରମ୍ବାର ମା’କୁ ଉଠାଇବାକୁ ଚେଷ୍ଠାକରିଛି।

ମାର ଉପରେ ଢଙ୍କା ଯାଇଥିବା ଲୁଗାକୁ ଟାଣୁଥିବାର ଦୃଶ୍ୟ ସମଗ୍ର ଷ୍ଟେସନ ପରିସରକୁ ଭାବବିହୄବଳ କରି ପକାଇଥିଲା । ଦୁନିଆକୁ ବୁଝିବା ପୂର୍ବରୁ ଛୋଟିଆ ଶିଶୁଟିର ସର୍ବଶ୍ବ ଛଡାଇ ନେଇଛି ଏହି କରୋନା ଆଉ ଦାଦନ । ପ୍ରତିଦିନ ଦେଶର ବିଭିନ୍ନ ପ୍ରାନ୍ତରେ ଦାଦନ ଶ୍ରମିକ ମାନଙ୍କର ଯନ୍ତ୍ରଣାର ଚିତ୍ର ଦେଖିଦେଖି ପଥର ପାଲଟି ଯାଇଥିବା ମନ ଉପରେ ଏ ଆଉ ଏକ ଆଘାତ ମିଳିଛି ।

ଦାଦନ ଦୁଃଖ କେତେଯେ ଭୟଙ୍କର ହୋଇ ପାରେ ତାହା ଏହି ଘଟଣାରୁ ପ୍ରମାଣିତ ହୋଇଛି । ଏଠାରେ ସ୍ମରଣଯୋଗ୍ୟ ନିକଟରେ ଓଡିଶାର ଜନୈକ ମହିଳା ଏକ ଶ୍ରମିକ ସ୍ପେଶାଲ ଟ୍ରେନରେ ଆସି ପହଞ୍ଚିବା ପରେ ସମାନ ଢଙ୍ଗରେ ତାଙ୍କର ମୃତଦେହ ମିଳିଥିଲା । କରୋନାର କୋଳାହଳ ମଧ୍ୟରେ ଏ ନିରୀହ ଗରୀବ ମଣିଷ ମାନଙ୍କର ଯନ୍ତ୍ରଣାର କାହାଣୀ ସମସ୍ତଙ୍କୁ ଖୁବ୍ କଷ୍ଟ ଦେଇ ଚାଲିଛି।

ଅଧ୍ୟାପକ ବିରଞ୍ଚି ନାରାୟଣ ଦାସ

କୋରେଇ