ଜିଲା ପରିଷଦ ବୈଠକ ର ଫଳ ଶୁନ,ଅସହାୟ ଜିଲା ପରିଷଦ ସଦସ୍ୟ

ଯାଜପୁର (ସଂକେତ ଖବର ) ତୃଣମୁଳ ସ୍ତରରେ ବିକାଶ ପହଂଚାଇବା ଲକ୍ଷ୍ୟରେ ରାଜ୍ୟରେ ଆରମ୍ଭ ହୋଇଥିଲା ତ୍ରିସ୍ତରୀୟ ପଂଚାୟତରାଜ ବ୍ୟବସ୍ଥା । ସରପଂଚ,ସମିତିସଭ୍ୟ ଏବଂ ଜିଲାପରିଷଦ ସଦସ୍ୟଙ୍କୁ ନେଇ କରାଯାଇଥିଲା ଏହି ପଂଚାୟତିରାଜ ବ୍ୟବସ୍ଥା । ଲୋକଙ୍କ ସମସ୍ୟାକୁ ନେଇ ପ୍ରଶାସନ ନିକଟରେ ଲୋକପତିନିଧି ମାନେ ଉପସ୍ଥାପନ କରି ନିଜ ଅଂଚଳର ବିକାଶ ପାଇଁ ତିଆରି ହୋଇଥିଲା ଏହି ବ୍ୟବସ୍ଥା । କିନ୍ତୁ ଏବେ ଲୋକପ୍ରତିନିଧି ମାନଙ୍କର ସମସ୍ୟାକୁ ଆଦୌ ଗୁରୁତ୍ୱ ଦିଆଯାଉନଥିବା ଅଭିଯୋଗ କରିଛନ୍ତି ଲୋକପ୍ରତିନିଧି । ଯାଜପୁର ଜିଲାପରିଷଦ ର ଶେଷ ବୈଠକରେ ଏମିତି କିଛି କ୍ଷୋଭପ୍ରକାଶ କରିଛନ୍ତି ଖୋଦ ଶାସକ ଦଳ ର ଜିଲାପରିଷଦ ସଦସ୍ୟ । ପ୍ରଶାସନିକ ଅଧିକାରୀ ସମସ୍ୟା ସମାଧାନ କରିବା ତ ଦୁରେ ଥାଉ ଏପରିକି ସେମାନଙ୍କ ଟେଲିପୋଂନ ଉଠାଉନାହାଁନ୍ତି ସରକାରୀ ଅଧିକାରୀ । ସେପଟେ କୋଭିଡ ଜନିତ ଅସୁବିଧା ଯୋଗୁଁ ସମସ୍ୟା ଦେଖାଦେଇଛି ଏବଂ ଖୁବ ଶିଘ୍ର ସମାଧାନ ହୋଇଯିବ ବୋଲି ଜିଲାପାଳ କହିଛନ୍ତି ।

ସରିଲା ୫ମ ଯାଜପୁର ଜିଲା ପରିଷଦର ତ୍ରୟୋଦଶ ସାଧାରଣ ବୈଠକ । ଆଉ କିଛି ମାସ ପରେ ହେବ ପଂଚାୟତ ନିର୍ବାଚନ । ସେଥିପାଇଁ ଏହି ବୈଠକକୁ ଶେଷ ବୈଠକ ଭାବେ ଗ୍ରହଣ କରି ବେଶ ସରଗରମ ଆଲୋଚନା ହୋଇଥିଲା । ବିଶେଷ କରି ଜିଲା ପରିଷଦ ସଦସ୍ୟ ମାନେ ସରକାରୀ ଅଧିକାରୀ ମାନଙ୍କ ଖାମ ଖିଆଲି ମନୋଭାବ ଓ ଅବହେଳାକୁ ପ୍ରସଂଗ କରି ଆଲୋଚନା କରିଥିଲେ । ଗତ ୫ ବର୍ଷ ମଧ୍ୟରେ ୧୩ ଥର ଜିଲା ପରିଷଦ ମାନଙ୍କର ବୈଠକ ବସିଛି,ପ୍ରତି ଥର ବିଭିନ୍ନ ମୌଳିକ ସମସ୍ୟା ସଂପର୍କରେ ଜିଲା ପରିଷଦ ସଦସ୍ୟ ମାନେ ଆଲୋଚନା କରି ଏହାର ସମାଧାନ କରିବା ପାଇଁ ଦାବୀ ଉପସ୍ଥାପନ କରିଛନ୍ତି । କିନ୍ତୁ ସରକାରୀ ଅଧିକାରୀ ମାନେ ଏପରି ଦାବୀ କୁ ସଂପୁର୍ଣ୍ଣ ଅଣଦେଖା କରିବା ପଂଳରେ ସମସ୍ୟା ଯେଉଁଠି କି ସେଇଠି ରହିଯାଇଥିବା ଅଭିଯୋଗ ହୋଇଥିଲା । ଖୋଦ ଶାସକ ଦଳର ଜିଲା ପରିଷଦ ସଦସ୍ୟ ମାନେ ଏପରି ଅଭିଯୋଗ କରିଥିଲେ । ଶିକ୍ଷା,ସ୍ୱାସ୍ଥ୍ୟ,ଗମନାଗମନ,ଯୋଗାଣ ଏବଂ ବିଜୁଳି ଭଳି ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଂଗରେ ଜିଲାପରିଷଦ ମାନେ ରଖୁଥିବା ପ୍ରସ୍ତାବକୁ ଆଦୌ କାର୍ଯ୍ୟକାରୀ କରାଯାଉନଥିବା ମଧ୍ୟ ଅଭିଯୋଗ ହୋଇଥିଲା । ଏପରିକି ଜିଲା ପରିଷଦ ସଦସ୍ୟ ମାନଙ୍କୁ ୯ ଲକ୍ଷ ଟଙ୍କାର ପ୍ରକଳ୍ପ ଚିଠା ଦେଇ ପରବର୍ତି ସମୟରେ ଏହାକୁ ବନ୍ଦ କରିବା ପଂଳରେ ସେମାନଙ୍କ ମର୍ଯ୍ୟାଦା ହାନୀ ହୋଇଥିବା ଅଭିଯୋଗ କରିଥିଲେ ।

ଯାଜପୁର ଜିଲାରେ ମୋଟ ୩୯ ଜଣ ଜିଲାପରିଷଦ ସଦସ୍ୟଙ୍କ ମଧ୍ୟରୁ ବର୍ତମାନ କେବଳ ବିଜେଡିର ୩୮ ଜଣ ସଦସ୍ୟ ରହିଛନ୍ତି । ଜିଲାପରିଷଦର ଶେଷ ବୈଠକରେ ଶାସକ ଦଳର ସଦସ୍ୟ ମାନେ ସରକାରୀ ଅଧିକାରୀଙ୍କୁ ସିଧାସଳଖ ଟାର୍ଗେଟ କରୁଥିବା ଦେଖିବାକୁ ମିଳିଥିଲା । ଜିଲା ପରିଷଦ ବୈଠକରେ ସମସ୍ତ ବିଭାଗର ଅଧିକାରୀ ମାନେ ଉପସ୍ଥିତ ରହିବା ପାଇଁ ନିୟମ ଥିଲେ ମଧ୍ୟ ଅନେକ ବିଭାଗର ଅଧିକାରୀଙ୍କ ଅନୁପସ୍ଥିତ ଯୋଗୁଁ ସଂପୃକ୍ତ ବିଭାଗର ଆଲୋଚନା ହୋଇପାରିନଥିଲା । ଜିଲାପରିଷଦ ସଦସ୍ୟ ମାନଙ୍କ ପୋଂନ କୁ ଆଦୌ ସରକାରୀ ଅଧିକାରୀ ମାନେ ରିସିଭ କରୁନଥିବା ଅଭିଯୋଗ ହୋଇଥିଲା । ବୈଠକରେ ଉପସ୍ଥିତ ଥିବା ବିଧାୟକ ଓ ସାଂସଦ ଜିଲାପରିଷଦ ସଦସ୍ୟ ମାନଙ୍କ ସପକ୍ଷରେ ଯୁକ୍ତି ବାଢ଼ି ସରକାରୀ ଅଧିକାରୀଙ୍କୁ ମଧ୍ୟ ତାଗିଦ କରିଥିଲେ । ତେବେ ଜିଲାପରିଷଦ ସଦସ୍ୟ ମାନେ ଦେଉଥିବା ପ୍ରସ୍ତାବ ଗୁଡିକୁ କାର୍ଯ୍ୟକାରୀ କରାଯାଉଛି କିନ୍ତୁ କୋରୋନା ପାଇଁ ଅନେକ ପ୍ରକଳ୍ପ କାମ ପଛେଇ ଯାଇଛି ବୋଲି ଜିଲାପାଳ ସୂଚନା ଦେଇଥିଲେ । ସେହିପରି ଜିଲାପରିଷଦ ସଦସ୍ୟ ମାନଙ୍କୁ ଦିଆଯାଇଥିବା ଅନୁଦାନ ବନ୍ଦ ନେଇ ଅନୁଧ୍ୟାନ କରାଯିବ ଓ ସମସ୍ୟାର ସମାଧାନ କରାଯିବ ବୋଲି ଜିଲାପରିଷଦ ଅଧ୍ୟକ୍ଷ ପ୍ରତିଶୃତି ଦେଇଥିଲେ ।

କେବଳ ତ୍ରିସ୍ତରୀୟ ପଂଚାୟତରାଜ ବ୍ୟବସ୍ଥା କରି ଜିଲାପରିଷଦ ସଦସ୍ୟ ମାନଙ୍କୁ ନିର୍ବାଚିତ କରାଯାଇଛି ସତ କିନ୍ତୁ ସେମାନଙ୍କ ମତାମତ କୁ କେତେ ଦୂର ଗ୍ରହଣ କରାଯାଇ ସମସ୍ୟାର ସମାଧାନ କରାଯାଉଛି ତାହା ବୈଠକରେ ଜଣାପଡିଛି ।