ମାଟି ତଳୁ ଯୁବତୀଙ୍କ ମୃତଦେହ ଉଦ୍ଧାର କଲା ପୋଲିସ
ଯାଜପୁର (ସଙ୍କେତ ଖବର): ସ୍ମଶାନର ମାଟି ତଳୁ ଯୁବତୀଙ୍କ ମୃତଦେହ ଉଦ୍ଧାର କଲା ପୋଲିସ। ତିନିଦିନ ତଳେ ଯୁବତୀଙ୍କର ଅସ୍ୱଭାବିକ ମୃତ୍ୟୁ ଘଟିଥିଲା। ମୃତ୍ୟୁ ପରେ ପୋଲିସ ଅଗୋଚରରେ ପରିବାର ଲୋକେ ଗାଁ ମଶାଣିରେ ଗଭୀର ଗର୍ତ୍ତ କରି ଯୁବତୀଙ୍କ ମୃତ ଦେହକୁ ପୋତି ଦେଇଥିଲେ। ମୃତ୍ୟୁର ତିନି ଦିନ ପରେ କୌଣସି ବିଶ୍ୱସ୍ତ ସୂତ୍ରରୁ ଖବର ପାଇ ଆଜି ପୋଲିସ ଏବଂ ମାଜିଷ୍ଟ୍ରେଟଙ୍କ ଉପସ୍ଥିତିରେ ମେସିନ ଯୋଗେ ମାଟି ତାଡି ଶବକୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ଶବ ବ୍ୟବଚ୍ଛେଦ ପାଇଁ ପଠାଇଛି। ଏଭଳି ଏକ ଘଟଣା ଘଟିଛି ଯାଜପୁର ଜିଲ୍ଲା ଧର୍ମଶାଳା ଥାନା ଅନ୍ତର୍ଗତ ଆରୁହା ଗାଁର ସ୍ୱର୍ଗତ ଅନନ୍ତ ଜେନାଙ୍କ ଝିଅ ଉପାସନାଙ୍କର ଗତ ରବିବାର ଦିନ ମୃତ୍ୟୁ ଘଟିଥିଲା।
ଏସପି ରାହୁଲ ପି ଆରଙ୍କ ନିର୍ଦ୍ଦେଶ କ୍ରମେ ଯୁବତୀଙ୍କ କେଉଁ କାରଣରୁ ମୃତ୍ୟୁ ହେଲା ସେ ନେଇ ତଦନ୍ତ ଆରମ୍ଭ କରିଛି ଧର୍ମଶାଳା ପୋଲିସ। ତେବେ ଯୁବତୀଙ୍କର କେଉଁଭଳି ଭାବେ ମୃତ୍ୟୁ ହେଲା। କାହିଁକି ପୋଲିସକୁ ନଜଣାଇ ମୃତ ଦେହକୁ ପୋତି ଦିଆଗଲା ତାହା ଏବେ ସନ୍ଦେହ ଘେରରେ ରହିଥିବା ବେଳେ ପୋଲିସ ଯୁବତୀଙ୍କ ମୃତଦେହକୁ ବାହାର କରି ବ୍ୟବଛେଦ ପାଇଁ ପଠାଇଛି। ରିପୋର୍ଟ ଆସିବା ପରେ ସମସ୍ତ ଘଟଣା ସାମ୍ନାକୁ ଆସିବ ବୋଲି ଆଶା କରାଯାଉଛି । ଘରେ ବିଧବା ମା ଓ ଭାଇ ରହୁଥିବା ବେଳେ ଯୁବତୀଙ୍କ କିଭଳି ଭାବେ ମୃତ୍ୟୁ ହେଲା ଏ ନେଇ ଘର ଲୋକ କୌଣସି ପ୍ରତିକ୍ରିୟା ଦେଇ ନାହାଁନ୍ତି। ତେବେ ପୋଲିସ ଏ ସଂକ୍ରାନ୍ତରେ ଏକ ଅପମୃତ୍ୟୁ ମାମଲା ରୁଜୁ କରି ଘଟଣାର ଅଧିକ ତଦନ୍ତ ଜାରୀ ରଖିଛି।
