ମୁଖ୍ୟମନ୍ତ୍ରୀଙ୍କ ଘୋଷଣା;କୁଆଖିଆରେ ହେବ ସ୍ୱତନ୍ତ୍ର କୋଭିଡ ହସ୍ପିଟାଲ

ଯାଜପୁର(ସଂକେତ ଖବର) ଯାଜପୁର ଜିଲାର କୁଆଖିଆ ଠାରେ ଏକ ସ୍ୱତନ୍ତ୍ର କୋଭିଡ ହସ୍ପିଟାଲ ଆରମ୍ଭ ହେବ ବୋଲି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଘରୋଇ ଭୂମିକା ହସ୍ପିଟାଲ ସହାୟତାରେ ଏହି କୋଭିଡ ହସ୍ପିଟାଲଟି କାର୍ଯ୍ୟକ୍ଷମ ହେବ । ଯେଉଁଥିରେ ୧୫୦ଟି ଅକ୍ସିଜେନ ସପୋର୍ଟ ବେଡ ରହିବା ସହିତ ୫୦ଟି ଆଇସିୟୁ ବେଡ ରହିବ । ଯାଜପୁର ଜିଲାରେ କୋରୋନା ଗ୍ରାପଂ ଦିନକୁ ଦିନ ବଢ଼ୁଥିବା ବେଳେ ପ୍ରଶାସନ ପକ୍ଷରୁ ଏଠାରେ ହସ୍ପିଟାଲ ପ୍ରତିଷ୍ଠା କରି ଆଗୁଆ ପଦକ୍ଷେପ ଗ୍ରହଣ କରାଯାଇଛି । କୋରୋନା ରୋଗୀ ଙ୍କ ଚିକିତ୍ସା ପାଇଁ ଏନସି କଲେଜରେ କୋଭିଡ କେୟାର ସେଂଟର ଏବଂ ଟାଟା ମେଡିକା ହସ୍ପିଟାଲ ରହିଛି । କିନ୍ତୁ ବଢ଼ୁଥିବା ରୋଗୀଙ୍କ ସଂଖ୍ୟାକୁ ଦେଖି ପ୍ରଶାସନ ପକ୍ଷରୁ ଏଭଳି ନିଷ୍ପତି ନିଆଯାଇଛି ।

ଏଠାରେ ହସ୍ପିଟାଲ ପ୍ରତିଷ୍ଠା ହେଲେ ଗୁରୁତର ରୋଗୀଙ୍କୁ ଆଉ କଟକ କିମ୍ବା ଭୁବନେଶ୍ୱର ସ୍ଥାନାନ୍ତର କରାଯିବ ନାହିଁ । ଗତ ବର୍ଷ କୋଭିଡ ମୁକାବିଲା ସମୟରେ ଜାରକା ସ୍ଥିତ ଭୂମିକା ହସ୍ପିଟାଲ କୁ କୋଭିଡ ହସ୍ପିଟାଲ କରାଯିବା ପାଇଁ ଏମଓୟୁ ସ୍ୱାକ୍ଷର ମଧ୍ୟ କରାଯାଇଥିଲା । କିନ୍ତୁ ପରବର୍ତି ସମୟରେ ଏହାକୁ ବାତିଲ କରାଯାଇଥିଲା । ନିକଟରେ କୁଆଖିଆର ଏହି ଭୂମିକା ହସ୍ପିଟାଲର ଭିତିଭୂମିକୁ ଯାଂଚ କରିବା ପାଇଁ ଯାଜପୁର ଜିଲାପାଳ ଚକ୍ରବର୍ତି ସିଂ ରାଠୋର ଯାଇ ରାଜ୍ୟସରକାରଙ୍କୁ ରିପୋର୍ଟ ଦେଇଥିଲେ । ଆଜି କୁଆଖିଆ ଠାରେ ଏହି ସ୍ୱତନ୍ତ୍ର କୋଭିଡ ହସ୍ପିଟାଲ ପ୍ରତିଷ୍ଠା ପାଇଁ ମୁଖ୍ୟମନ୍ତ୍ରୀ ଘୋଷଣା ହେବା ପରେ ଜିଲାବାସୀଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି । ଏଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ମଧ୍ୟ ଧନ୍ୟବାଦ ଦେଇଛନ୍ତି ।